ELBASAN - Pas 72 orëve në paraburgim, këngëtari i muzikës tallava, Pëllumb Elmazi, i njohur me emrin Mandi i Nishtullës, është liruar nga gjykata me masën “Detyrim paraqitjeje”.
Mandi i Nishtullës u bë i famshëm kohët e fundit me këngën “Të ka lali shpirt”, e cila ka thyer rekord klikimesh në “You Tube”. Ai u arrestua këtë javë në një nga rrugët kryesore të qytetit të Elbasanit, pasi gjatë kontrollit policor rezultoi se po e drejtonte automjetin në gjendje të dehur.
Gjatë kontrollit rezultoi se automjeti luksoz tip “Audi A6″ që drejtonte këngëtari 23-vjeçar, nuk ishte në pronësi të tij dhe për më tepër nuk ka pasur as lejen e qarkullimit me vete. Ndërkaq, Elmazi u akuzua edhe për kundërshtim të efektivëve të policisë, të cilët i kishin kërkuar të bënte testin e alkoolit, por ka qenë e pamundur, pasi ai i ka kërcënuar dhe fyer. Mandi i Nishtullës u bë i famshëm fillimisht për elbasanasit, pasi zotëronte një lokal luksoz me qira pranë universitetit “Aleksandër Xhuvani”, ku çdo natë performonte vetë ose ftonte këngëtarë të ndryshëm.
